I DUH ZÂWNG … TI RAWH SE

MATTHAIA 6:10b
I duh zâwng vâna an tih angin leia min ti rawh se.

Helai thu tak hi Luka chuan a ziak tel ve lo. Vânah chuan sual a awm tawh lo va. Pathian duh zâwng tiin hlim takin hun an hmang a. Krista hnehna puan chhuah te, Amen Halleluiah tia, lâm leh rimawi tinrênga Pathian fak leh chawimawi chu an hnapui ber niin a lang (Thup. 5;12;19). Vâna mite duh zâwng chu nun dân thianghlim te, nun dân dik te, fel taka tih ṭhin te leh chawimawina leh fakna hlante a ni a.

“I duh zâwng vâna an tih angin leia min ti rawh se,” tih hi “I ram lo thleng rawh se,” tih nên a thu a inlalâwn ṭha hle a. Pathian ram thlenna hmun apiangah Pathian duh zâwng tih chu miin a chaw tui ber a lo ni tawh ṭhin. Vâna mite duh zâwng ti lova mahni duh zâwng kan tih leh ṭhin avâng hian hmêlma pa bâwihah kan tâng leh ṭhin niin a lang. Kohhran belh tlat te, Bible chhiar leh ṭawngṭai te leh Pathian hnêna thilpêk te hi Vâna mite duh zâwng Bible-a inziak kan tih ve ngei ngei tûr kan hmuh zînga pawimawh tak tak te an ni.