NI TIN … MIN PE ANG CHE

LUKA 11:3
Ni tin kan ei khawpin chaw min pe ang che.

Lukan ‘ni tin kan ei khawpin’ a tih laiin Matthaia chuan ‘vawiinah hian kan ei khawpin’ a ti ve thung a. Israel faten thlalêra manna an ei ṭhin lai khân ni khat ei bâk chhar khâwl theih a ni lo va. Sabbath hma ni chiahah sabbath-a an ei tûr an chhar khâwl thei a ni. Pathianin Israel-ho manna a pêk dân ang deuh khân Lal Isua hian a chuang a liam lam sawi lovin ni khata kan tla tâwk, ei tûr a hnêna dîl tûra min zirtîrna a nih a rinawm (Ex. 16:4).

Tlâng chunga Lal Isua thusawi pawimawh tak pakhat chu, “Chutichuan, a tûk atân lungkham suh u…” (Mt. 6:43) tih hi a ni. Tisa mamawh lama inchhêk khâwl vakna hian thlarau lama kan mamawh a nêkchêp theih avâng leh amah kan rinna a tihbo theih avângin Lal Isua hian ni tina amah rinrâwla kan hman a duh avângin min zirtîr a ni ang. Ni tin ei khawp dîltuten kan ei sên loh neih kan tum bawk si hi ngaihtuah zui tham tak a tling âwm e.