SARUAK

— Chhantea (Oriela patea)
E. Lungdar

Tu pawh mai hi saruakin awm ila kan nalh êm êm lo mai thei. Tin, mihring nihphung tûr a ni lo ah kan ngai bawk ang. Thlalâk-ah taksa lang hnem deuh chu a chuti a kha ti… kan tiin kan sêl ṭhin. Eng vâng nge?

GENESIS 2:25
Tin, Adama leh a nupui chu an pahnihin saruakin an awm a, an zak lêm lo va.

Bible kan en chuan mihring hmasa te nupa kha saruak a awm an nih thu kan hmu a, an zah lêm loh thu pawh kan hmu bawk. Eng nge a chhan ni ang le?

Mihringte kha Pathian dân an bawhchhiat hma khan Eden huanah Pathian thu thu in Pathianin awm tûra a tih ang angin an awm a. Pathian khan *saruaka* an awm kha ṭha a ti a, an awm mai a ni. Khîng ka sawi tâk zawng zawngte khi bawhchhiat hmâ nun zia a ni. Suala tlûk hmâ chuan Pathian thu thuin Pathian thupêk zâwmin an awm a, anmahni-ah an ngaih dân leh duh dân aiin Pathian ngaih dân leh duh dân kha a lal zâwk a ni.

Mahse, mihringte chuan Pathian dân chu bawhchhiain ei loh tûr eiin sual lamah an lo nung ta a. Pathianin an nihna tûr leh an awm dân tûr a ṭha a tih kha ṭha an ti ve ta lo a.

“GENESIS 3:7 — Tichuan an pahnih chuan an mit a lo vâr a, saruak an nih an lo inhre ta a; tichuan theipui hnah an thui khâwm a, pawnfên an insiam chawp a,” saruak a awm duh loh in silhfên an insiam chawp ta a ni.

Tunah hian nang leh kei hi Pathian hmaah saruak kan ni nge ni lo? Kan nun leh kan chêt vêlnaah hian Pathian duh dân nge lal zâwk kan duh dân? Tu pawh mai hi mahni kan inhrechiang ber ang.

Eng ang a nalh leh hmelṭha, inthuam nalh leh felfai pawh ni ila Hebrai ziaktu chuan Pathian hmaa mihringte lan dân ti hian a lo sawi –
“HEBRAI 4:13 — Thil siam ama mit hmuha lang lo rêng rêng a awm lo; kan chanchin kan thlenna tûra mit hmuhah chuan, engkim saruak leh inhawng sain a awm zâwk a ni.”

Kan nalh leh kan mawi lai ber pawhin saruak leh inhawng sa vek tho kan ni e ama mit hmuhah hian…

Chuvangin kan ni tin nunah hian Pathian duh zâwng eng nge tih kan hre vek a. Pathian duh zâwng leh awm tûr a min tih ang a awm mai hi ringtuten kan tih tûr a ni. Chu chu kan mawina, kan nalhna, kan hmelṭhatna te a lo ni.

Lalpa’n a thu malsâwm rawh se.