MARANATHA

— K. Lalnunpuia

Kohhran hmasate khân tihduhdahna leh hrehawmna chi hrang hrang an tawrh lai khan ringtute chu hmun hrang hrangah an tlân darh a, pûkah te an biru a. Rilru leh thinlung thlabâr rêng rêngin an awm reng ang tih a rin theih. Khatiang khân awm mah se, ringtute an inthlamuanna leh an inhnemna chu MARANATHA tih hi a ni a, chumi awmzia chu ‘Isua a lo kal leh dâwn’ tihna a ni.

Hrehawm taka awmin tihduhdahin awm mah se, Lal Isua’n mithianghlim a lâwr hunah chuan chung zawng zawng chu an tuar leh tawh ngai dâwn lo va, thlamuang takin an châwl tawh dâwn a ni tih hriain MARANATHA, ‘Isua a lo kal leh dâwn a, heng hrehawmna leh tihduhdahna hi chu a la kiang vek dâwn a ni,’ tiin an inthlamuan tawn ṭhin a ni. Chumi thua inthlamuan tawn tûr chuan Paula pawhin ringtute min fuih a nih kha. (I Thess. 4:13-18).

Tûnlai khawvêl boruak kan hria a, tûnlai thil awmzia kan hria a, Lal Isua ngeiin a lo kal leh dâwn hnaiha thil thleng tûr a sawi chu a thleng ta mawlh mawlh mai a nih hi. Hengte hi inralrinna dâr a ni tih hria a, inpeih lote inpeih a, mithianghlim lâwra kal ngei thei tûra kan inbuatsaih nân hmang zâwk ila, thlabâr nan leh chi-ai nâna hmang lovin ‘Isua a lo kal leh dâwn’ (Maranatha) tiin mahni ṭheuh inbuatsaih nân leh Pathian lama thlamuan nân hman i tum ṭheuh zâwk ang u.