BUMIN AWM SUH U

GALATIA 6:7-8
Bumin awm suh u; Pathian chu hmuhsit zia a ni lo ve; miin a theh apiang, chumi vêk chu a seng bawk dâwn si a; mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuana nunna a seng dâwn a ni.

Kan Bible-ah hian ‘bum’ tih lam hawi hi vawi 70 vêl lai kan hmu a. Bum tih hi intihder tihte nên thuhmun a ni kan ti thei ang. Hmân aṭanga vawiin thlengin inbum hi Setana hmanraw ṭha tak a la ni a. Inbumna hian mi vanneihna a tihbosak a, mi vanduai leh inchhîr tam tak a siam ṭhin a. Kan mihringpuite chauh ni lovin ruih theih thilte leh hurna hmangte pawhin Setanan min bum thei a ni.

Mi tak buma an awm mêk avângin bumna thangah kan âwk ve palh ang tih hlauvin kan inven nân Paulan min hrilh a. Kan chi theh a chhia a ṭha la seng tûr kan ni a. Rah ṭha kan seng theih nân bumin i awm lo hrâm hrâm ang u. Khawvêla mi khawngaihthlâk berte chu sual buma awmte hi an ni. Buma kan awm loh nân fîmkhur takin kan ni tin hun i hmang ang u.