JOSEFA LEH NIKODEMA

JOHANA 19:38-39
Tin, chumi hnuah chuan Josefa, Arimathai khuaa mi, Isua zirtîr, nimahsela, Juda-te a hlauh avânga a rûka awm chuan Isua ruang chu kalpui atân Pilata hnênah a dîl a; tin, Pilatan a phal a. Chutichuan, a lo kal a, a ruang chu a kalpui ta a. Tin, Nikodema, a tîra zâna a hnêna lo kal kha, murra leh aloe inpawlh sa bûk sawmnga lai sinin a lo kal ve a.

Josefa leh Nikodema-te hi Sanhedrin member an ni ve vein a lang. Mi dang mitmei vên vânga a rûk tea Isua zuitu an ni (Johana 7:50-52).

Josefa, Isua damlaia a rûk tea zirtîr ni ṭhin khân huai takin Pilata hnênah Isua ruang a dîl a (Deut. 21:22-23), puan zâi sînin Isua ruang a tuam a, Nikodeman murra leh aloe inpawlhsa Isua tuamna kâra dah tûr a rawn kente nên chuan tumah la zalh ngai lohna thlânah chuan an zalh ta a ni. Isua zuitu mi tam tak chu mi rethei te te an ni a. Josefa leh Nikodema ten a hun takah zahawm taka Isua phûm tûrin hmâ an la hi a ṭangkaiin a chhinchhiah tlâk hle.

Min entîr rawh an zalhna che,
Ṭapa an vuina che;
Puan vâr sin vantirhkoh hovin,
I ruang an vênna kha.

Isua tân eng nge i tih ve dâwn?