MIN VÊNPUI RAWH U

MATTHAIA 26:38
Tin, an hnênah, “Ka rilru a lungngai êm êm a, thihna khawp hial a ni; hetah hian awm ula, mi vênpui rawh u,” a ti a.

Isuan amah vênpui tûrin a zirtîrte a pun a; Petera, Johana leh Jakoba te a hruai hrang a. Keini ang bawka mangang leh lungngai thei a ni a. Gethsemane-a a lungngaih pawh thihna khawp hial a ni. A thlan pawh thisen angin a far hial a nih kha. A zirtîrte ṭawngṭaipuina pawh a dîl hreh lo hial a ni.

Zirtîrte lah chu vênpui tûra a tih lawm lawm pawhin an mut a chhuak a, ṭum hnih lai muhîlin a rawn phâwk a.

Kan unauten harsatna, thlêmna an tawh laiin kan vênpui tûr a ni. Ka nau vêngtu ka ni em ni? tia indah fihlim chi a ni lo. Râlkhata inthlîr a, an hnêna engmah kawng ṭha zâwk hrilh si lo leh ṭawngṭaipui bawk si lovin, ‘Ka ring lo rêng a ni’ tia inrêl zui chu a dik lo. Inpêng tawn, indâwm kâng tlâng tûr kan ni tih i hre reng ang u.

Ka ṭawngṭaisak fo che, (3)
Ka ṭawngṭaisak che.

LALPA, mi dang vênpui thei tûrin min pui ang che.