KRAWS LERA ISUA THUSAWI 1-NA

LUKA 23:34
“Ka Pa, anni hi ngaidam rawh; an thiltih hi an hre lo a nih hi.”

Hmelmâte hmangaiha, ânchhia lawhtute malsâwmsaka, a tiduhdahtute ṭawngṭaisak tûra zirtîrtu, Lal Isua chuan a thu sawi a takin a nunpui chiang hle mai. Krawsa khenbeh hi a nat êm avângin an nu te, an pian ni te leh a khengbettute ânchhe tinrêng an lawh ṭhin a. A kam tam zualte phei chu an leite pawh an tansak hial ṭhin niin an sawi.

Krawsa khenbeh dangten ânchhe tinrêng an au chhuahpui laiin Lal Isua chuan amah khêngbettute ngaidam tûrin a Pa hnênah a ṭawngṭai a ni. A va ropui êm! Kan hmêlmate chu sawi loh, kan unaute leh kan ṭhenawmte pawh ngaidam thei lo kan ni em? “Kan chunga thil tisualtute kan ngaidam angin, nang pawhin kan thil tihsual ngaidam ang che,” tih hi sawi thei kan ni ang em? Lal Isuan amah khêngbettute tâna a ṭawngṭaisak thei ang hian kan hmêlmate tâna ṭawngṭaisak i zîr ve ang u.