KRAWS LERA ISUA THUSAWI 6-NA

JOHANA 19:30
Tin, Isuan uain thûr chu a lo in zawh chuan, “A kin ta,” a ti a. Tin, a lu a kûn a, a thlarau a thlah ta a.

Khawvêl chhandam nân Bethlehem ran thlêng aṭangin Isuan kraws a rawn ṭan a. Kalvari kraws-ah a vawrtâwp a thleng ta a. A hmabâk tih tûr awm zawng zawng a ti zo ta a ni.

Pasalṭhaten sa an kahin hnehtu an nihna hladova an chham chhuak angin, kraws lêrah “A kin ta” tia Lal Isua a au hian ‘hmêlmapa chu hnehin a awm ta’ tih a chham chhuahna a ni.

“A kin ta,” tih hi, ‘Kalvari Hlado’ ti pawhin kan sawi thei awm e. He hnehna ropui tak avang hian mi zawng zawng tân chhandamna kawng a inhawng ta a. Khawvêlin a tlâwm nia an hriat laiin khawvêl a hneh thu kan Lal Isua hian a puang chhuak ta zâwk a ni.

“Indona chu Lalpa indona a ni a, hnehna chu Lalpa ta a ni.”