ISUA LEH JAKOBA

MARKA 6:3
He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo vem ni? A farnute pawh hetah kan hnêna awm an ni lo vem ni?” an ti a, mak an ti hle a. Tichuan, a chungah an lungni ta lo va.

Isua kha a khuate bâkah a unauten an ring lova, (Jn 7:1-5). “A â nih chu le,” tiin man tumin an thawk hial (Mk 3:21). Apokripha Chanchin Ṭha Hebrew-ah chuan Jakoban Isua chunga a awm dân a inchhîr thu leh a tho leh a hmuh hma loh chu engmah eia in lo tûrin a intiam thu târlan a ni.

Jakoba lehkhathawn hi Isua unau Jakoba, Pathian leh Lal Isua Krista bawih tia inchhâl ziah a ni (Galatia 1:19, 2:9). Jerusalema Juda-kristian kohhran ho ban, pawimawh tak a ni. Jerusalem inkhâwmpuiah pawh khân a puipa ber (chairman) a ni (Tirh 15:13-21). Isua thlâwp lo ṭhin a rilru tinatu mah ni se inchhîra a sim leh hnua a hnêna Isua a rawn inlâr (1 Kor 15:7) leh hian kan LALPA ngaihdamna thûkzia kan hmu thei. A duh loh zâwnga lo nung tawh kan nih pawhin simin a hnên i pan ang u. Ani chuan min ngaihdam a duh reng a ni tih i hria ang u.

Ka lo haw, ka lo haw,
Bo tawh lo tûrin;
I taa awm reng turin,
LALPA, ka lo haw.

Isua ngaihdamna panin lo haw rawh.