BUMTU CHU BUMIN A AWM

GENESIS 29:25
Tin, heti hi a ni a, zîng a lo nih chuan, ngai teh, Leaii a lo ni si a; tichuan, Jakoba chuan Labana hnênah, “Ka chunga i thiltih hi engtizia nge ni le? Rakili nei tûrin i rawng ka bâwl lo vem ni? Eng vângin nge mi bum mai le?” a ti a.

Jakoba chuan a nu Rebeki remruatnain a pa Isaaka bumin fatîr malsâwmna a pa hnên aṭangin a dawng a. Esauva thinrim chuan a pa thih hunah a nau chu thah a tum a, Rebeki remruatnain a nu nuṭa Labana hnênah a va awm ta a. Kum sarih zet Rakili nei tûrin hna a thawk a, an inneih zân chuan a dîl loh leh a ngaihzâwn loh zâwk Leaii a pe a. A pu chu, ‘Eng vângin nge mi bum mai le?,’ a ti hial. Ni sarih hnuah Rakili chu a nei leh a, kum sarih dang a pu rawng a bâwl leh ta a ni.

Jakoba, bumtu-a chu bum lêtin a awm (Gal 6:7). I fimkhur ang u khai! Kan thiltihsual hian min ṭhing lêt leh ṭhin. Chi ṭha kan theh chuan thil ṭha seng tûr kan nei ang. Bumtu ni lovin, thil ṭha theh darhtu leh tuhtu nih i tum tlat ang u.

Pathian hnên ata ka bo hnu,
Tûnah ka lo haw;
Sual kawng thûk tak mai ka zawh hnu,
LALPA, ka lo haw.

Thil ṭha theh darhtu ni ang che.