UIKAWM CHU CHÂNNA

LUKA 12:20-21
Nimahsela, Pathianin a hnênah, ‘Mi â, zâninah hian i thlarau an lâksak dâwn che a ni; i thil deh chhuahte kha tu ta nge ni ta ang le?’ a ti a. Mahni tâna sum khâwla, Pathian lama ngah si lo chu, chuti chu a ni ṭhîn,” a ti a.

He thu hi mi hausa â tehkhin thu a ni a. Mi hausa pakhat a awm a, a lo a hlâwkin buh leh bâl a ngah a, a dahna pawh a hmasa aia liana saka, a neih zawng zawng dah khâwm a; a thlarau hnênah pawh châwl hahdam tûra hriattîr a tum nghe nghe a. Chutih lai tak chuan Pathianin a thlarau laksak a nih tûr thu a hriattîr ta a ni. He mi hausa pa hian mi rethei leh ṭanpui ngaite a hre chang lo va, malsawmtu Pathian pêk lêt a tum hek lo. A uikawm chu a chân phah ta zâwk a ni.

Kan thil neihah hian min petu hian chanvo a nei tûr a ni a. Mi rethei leh chanhaite ban phâkin kan awm tûr a ni bawk. Pathianin chanvo a neih ve lohna hausakna chu thâwklehkhatah a chhe rup ṭhin. Hausakna zawng zawng pawh hi kan Pathian ta a ni tih i hria ang u.