THLAMUANNA

— Chhantea (Oriela patea)
E. Lungdar

SAM 77:2-3
Ka mangan ni chuan Lalpa ka zawng a; Ka kut hi zânah pawh la thla lovin ka phar reng a; Ka nunna hian thlamuan a duh lo. Pathian ka hre reng a, ka buai ṭhîn; Ka ngaihtuah a, ka thlarau hi a chau ṭhîn. (Selah)

Thlamuanna leh thlamuantu hi kan nun hian mamawh loh lai a nei lo. Tûn hun hi kan mamawh zual ber ṭum a ni âwm e.

Khawvêlah hian thlipui, ruahpui leh thil dang tam tak lakah kan himna atân hian in leh lo ṭha leh ropui te, sum leh pai tam tak te, lîrthei ṭha tinrengte neih duhin a mawi leh mawi lo a dik leh dik lo pawh dâwn lovin kan hman hlel tlâng a nih hi.

Mahse, chûng thilte chuan thlamuanna tluantling rêng rêng min pe lo a, damchhûng daih pawh zuk ni hauh lo a. Kan duh leh mamawh kan hmuhna atân chuan a dik leh dik lo pawh thlu lovin pawisak rêng rêng neilovin kan tlân a, kan muanpui leh chuang si lo chu a nih hi.

Sam 77-naah Aspha chuan ‘Ka nunna hian thlamuan a duh lo. Pathian ka hrereng a ka buai ṭhin‘ a lo ti mauh mai. Ni e, Aspha a hunlaia temple zaipâwl hruaitu ni phâk mi pangngai aia dinhmun sânga ding hian Thlamuanna atân a dik a dawk thlu lo a sum leh pai lâkluh leh pawisak rêng nei lo a Pathian mitmei mai ni lo, a mihringpuite mitmei pawh vêng pha lo a mamawh dap khâwm tûr nise a ti ve thei reng. Mahse, chûng thil chu ti ve dâwnin thlamuanna atân a hman tum ni ve ta se Pathian a hre reng a chu Pathian duh loh zâwnga inthlamuante châk ve mahse a duh lo a. A buai ṭhin a ni.

Sam 73-na bu tîr lamah phei chuan heti hian a sawi hial a, misuaksual te leia an vânneihzia te a hmuhin a awt lutuk chuan a rap pelh ve lek lek tho ṭhin thu te a sawi a, nimahse, chûng thil ti a inthlamuan erawh chu Pathian a hriat reng avângin a tum ngam lo a ni.

Kan tûnlai hun tawnah hripui vânga kan ni tin khawsak nunphung a buai lai leh he hripui hneh lêt tûra mihring te thiamna leh finna-in a la hmuhchhuah loh lai hian eng nge i thlamuanpui le? Chu i thlamuanpui thil chuan tisa nun piah lam chatuan nun a thleng phâk em? mahni lo inzâwt ang u. Duhâm leh pamham luat avângin Thlamuanna leh thlamuanna dik chu kan kalsan hlauh ang e.

Kan Bible chuan hetiang hian a sawi…

JOHANA 14:26-27
Tin, Thlamuantu, Thlarau Thianghlim, Pain ka hminga a rawn tirh tûr khân, chu mi chuan engkim a zirtîr ang che u a, in hnêna ka sawi zawng zawng a hriat chhuahtîr leh ang che u. “Thlamuanna ka hnutchhiah a che u; keima thlamuanna ka pe a che u; khawvêlin a pêk angin ka pêk loh che u hi. In thinlung mangang suh se, hlauh pawh hlau suh se.

Khawvelin a pêk hi kan thlamuanna tûr daihkhawp a nih loh avângin Thlarau Thianghlim pêk min tiam. Chumi chang tûr erawh chuan a duhzâwnga awm ve kan tân a ṭul a ni.