DANGLAM NGAM RINGTU

ROM 12:2
He khawvêl dân ang hian awm suh ula; Pathian duh zâwng, a ṭha leh, lawm tlâk leh, ṭhat famkim chu in hriat fiah theih nân, in rilru a thara awmin lo danglam zâwk tawh rawh u.

Tirhkoh Paula Rom khuaa Kristiante a fuihna thu hi a mawi bâkah a pawimawh a, vawiin thlengin a la tûnlai êm êm rêng a ni. ‘He khawvêl dân ang hian awm suh ula’ a tih hi ‘khawvêl mite nun ṭâwmpui ve suh u’ a tihna niin an sawi ṭhin a, a dik hlein a rinawm.

Ringtu chu khawvêla awm ni mah ila khawvêl lakah kan danglam ngam tûr a ni. Mizoram chhûnga zu in lo thei, ram pâwna in mai thei ang chi te, mahni ina thianghlim taka khawsa thei, hmun dang leh ram danga thianghlim hlei thei lo tlat ang chite pawh hi a awm theih a. Pâwl sum leh kohhran sum thianghlim tak leh dik taka vawng thei, sawrkâr sum laka intithianghlim hlei thei lo leh vawng dik hlei thei lote hi a awm theih a ni âwm asin!

Mi tih dân leh tûnlai dân hi innghah nâna hmang lovin, ‘Lal Isua ni se engtin nge a tih ang?’ tih hi kan inzawhna tûr ni zêl se. Danglam ngam ringtu i ni ngam ang u.