PATHIAN RÂWN HMASAK

2 CHRONICLES 16:12-13
Tin, kum sawmthum leh kum kua a lal kumin Asa chu a ke a lo na ta a, a nâ chu nasa tak a ni; nimahsela, a natnaah chuan Lalpa râwn lovin damdawi thiamte a râwn zâwk a. Tin, Asa chu a pi leh pute hnênah a muhîl a, kum sawmli leh kum khat a lal kumin a thi a.

Asa chu Juda lal a ni a, a kê a nat chungchângah Pathian aiin damdawi thiam a râwn hmasa a, a thi ta a ni tih kan hria. Mizo Bible lehlin tharah chuan, ‘LALPA pan lovin doctor a pan zâwk a’ tia dah a ni. Han dam loh nikhua hian Pathian aiin doctor leh damdawi lam thiam mite emaw damdawi zuartute emaw lam ruâi a awl hle ṭhin a. Kan pan lo tûr tihna chu a ni hauh lo. Amaherawhchu, kan natna chungchângah Pathian hnêna kan ṭawngṭai hmasak zêl a pawimawh. Pathian râwn hmasak nachâng kan hriat chuan kan rilruah finna min pe ang a, pan tûr dik tak leh ei tûr dik tak pawh min hriattîr mai zâwk dâwn a ni.

Thiamnate pawh Pathianin mihringte min pêk vânga damdawi leh doctor-te pawh nei kan ni. Amaherawhchu, kan hriat reng tûr chu ‘kan nunna chunga thuneitu chu Pathian a ni’ tih hi a ni. I mangan a hnên thlen la, anin a lo ṭanpui zêl ang che.