FA THUAWIH I NI EM?

MATTHAIA 21:29-30
Ani chuan, ‘Ka duh lo,’ a ti a, a chhâng a; nimahsela, nakinah a rilru chu a lo inlamlêt a, a kal ta a. Tin, pakhat hnênah pawh chuan a va kal a, chutiang bawk chuan a va ti a. Tin, ani chuan, ‘Lalpa, ka kal ang e,’ a ti a, a chhâng a; nimahsela, a kal ta si lo va.

Mi pakhatin fapa pahnih a nei a, a pakhat zâwkin a ṭawngkamin a tisual a. A dangin ṭawngkam ṭha, mahse takna a pai lo thung. Juda hruaituten dân an zawm avângin tiṭha viauah an inngai a. Chhiahkhawntu leh nawhchizuarte chu misualah an ngai a, an en hniam hle a ni.

He tehkhin thua fapa hmasa zâwk hi chhiahkhawntu leh nawhchizuarte a sawina niin fapa pahnihna hi Juda hotute niin a lang. Baptistu Johanan felna kawng a rawn kawhhmuh a, inchhîrin an sual an sim lo. Chhiahkhawntu leh nawhchizuarten a tîrah awih lo mah se, inchhîra simin a hnên an pan a, vânram an chang thung. Fa thuawih i ni em? I inenfiah ang u.

A thu kan ring tak zet em?
Min hrilh angin kan thawk em?
Ama tân kan inphal em?
Rin hi thiltihah lang se.

Lalpan ti tûra min tih hi kan hnial nge kan zâwm?