CHAW NGHEI-1

2 CHRONICLES 20:2-3
Chutichuan, tuten emaw Jehosaphata hnênah, “Nangmah bei tûrin mipui tam tak mai, tuifinriat râl Suria aṭangin an lo thawk chiam mai… tiin an hrilh a. Tin, Jehosaphata chuan a hlau va, Lalpa zawng tûrin a inpe a; Judai ram zawng zawngah chaw nghei tûr thu a than vêl a.

Chaw nghei hi tih tak zeta miten Pathian an karna hmanraw pawimawh tak a ni a. Jehosaphata pawh Moaba thlah te, Amona thlah te leh Meun-hovin beih rawn an tum a, a hlauh avângin chaw ngheia Lalpa kar tûrin a mite a hriattîr ta ringawt mai a. Tichuan, Lalpan a hmêlmate chu a hnehsak ta a ni.

Chaw nghei hi hnam dang Kristian hote hian an lo uar khawp mai a. South Korea khawpui, Seoul-ah phei chuan ṭawngṭai tlâng an nei a, an rawngbâwltuten an berâmte tân chaw ngheiin Pathian an kar ṭhin an ti. Mizo Kristian tam berte chu rilṭama ṭawngṭai aia puar nelh nawlha ṭawngṭai thlang ṭhin kan ni a. Tûnah chuan chaw ngheia ṭawngṭai ṭhin kan nei ta nual a, a lawmawm khawp mai. Kan tih tak zetna chaw ngheia kan lantîr chuan chhânin a awm ngêi dâwn a ni.