THLARAU HRUAIA AWM

ROM 8:14-15
Pathian Thlarau hruaia awm apiangte chu Pathian fate an ni si a. Hlauva awm leh tûrin bawih nihna thlarau in hmu a ni si lo va; fa nihna thlarau in hmu a ni zâwk e, chu thlarau avâng chuan “Abba! (Ka pa!)” tiin kan au ṭhin hi.

Ringtu inti tam tak zîngah Pathian Thlarau hruaia awm aiin mahni duh zâwng kawng zawh kan tam zâwk daih âwm e. Hlauhna thlarau kan chang nasa ta lutukte hi Pathian Thlarau hruaia kan awm lohzia târ langtu a ni thei mai em? Pathian Thlarau hruaia awmte chuan hlauhna thlarau aiin huaisenna thlarau an chang zâwk ṭhîn niin a lang.

Thlarau Thianghlim thilpêk chi hrang hrang a awm a. A thilpêk dawng nazawngte hi Thlarau hruaiin an awm tihna a ni chuang lo. Amah be pawp a amah nêna lêng dûn nun neitute hi Pathian Thlarau hruaia awmte chu an ni ṭhîn. Thlarau hruaia awmte chuan an tih atâna ṭha tûr leh ṭha lo tûr te, an sawi âwm a nih leh nih lohte an thliar hrang thiam ṭhîn. Kan ni tin nun dân aṭang hian Thlarau hruaiin kan awm leh awm loh mahni i inzâwt ṭhîn ang u.