LOADIKEI KOHHRAN

— Chhantea (Oriela patea)
E. Lungdar

B/r Thupuan 3:14-22

Loadikei khua hi Asia minor phai ruam Lukas luikam a awm a ni, Antiochus II-na in a nupui Laudiki hming châwia a phuah niin an sawi. Khaw lûn tak damdawi lam zirna leh sumdâwnna hmunpui, kawngpui pawimawh takin a paltlang a ni a. A hunlai hian an khuaah hian bank-te hial a awm tawh niin an sawi. Loadikei kohhran hi Epaphra rawngbâwlna aqanga lo indin ni a sawi a ni a, kohhran lian leh chak tak a hnu a lo khawvêl thil te vânga lo tla hniam leh niin Isuan a dem nasat ber pâwl kohhran lo ni ta a ni.

THU PUAN 3:15-16
I thiltihte ka hria, i vawh hek lohva, i lum hek loh hi; i vawh emaw, i lum emaw ka duh a ni. Chutichuan, lum si lova, vâwt si lova, i lum chang chang avângin ka ka ata ka chhâk chhuak dâwn a che.

Lum silo vâwt silo tia a zilh chhan hi an khaw dinhmun nên inhmeh tak a ni a, tui harsatna hmun niin an tuilâk te hi a lum deuh pup ṭhîn a, chutiang ang lek chuan a thlarau nun chu a awm niin a hrilh a ni. Rawngbâwlna ngaiah an nei a, thil rêng rêng dân ang lekah an ti a, kohhranhote thiltihzia chu Pathian mit tlung zo a nih mawlh si loh avângin an nih tûr ang lam lam ni tûrin a duh a ni.

Keini pawh hi kohhranah dem tûr te, vuivaina tûr te kan hre viau anih chuan keimahni zâwk hi kan lo lum chang chang tawh hi a ni thei. Tin, kohhranah pawh a rawngbâwltuteah Krista leh kohhran tân a ṭhahnemngaihna tak tak neiloin kan nihna leh chanvo avângin a hming lekin kan ti a lo ni thei, chutiang kan nih chuan Lal Isuan a dem êm êm Loadikei kohhran ai hian kan ropui viau lo thei a ni.

Mahse, felloin dem hle mah se Isuan a hnâwl nghâl vek lo (khawngaihna fan hi ava sei em). Lum si lo vâwt si lo, lum chang chang lek kohhran kha harh tûrin a au va, sim a inlamlêt tûrin a ko mawlh mawlh zâwk a, chutah pawh an sim loh chuan, “A ka ata a chhâk chhuah tûr thuin a vaukhân zâwk a ni”.

Keini pawh kohhranhote hi kan mutthlûkna aṭanga kan harh theihna atan Pathian hian min ko reng a. Mimal chhûngkua te’n lei hausakna avângin eng mah tlachham lo a inngai a, nuam lên a kan lênlai hian… kan thlarau nun lam hi ngaihsak tûrin min duh takzet a ni. Kan thlarau nun lam ti châu rawih thei a eizawnna lamah kan tlân ang hian… a lam a ke pên tûrin min phût tlat a ni.

THU PUAN 3:19-20
Ka hmangaih apiang ka zilhhauvin ka thunun ṭhîn; chutichuan, ṭhahnemngai la, sim rawh. Ngai teh, kawngkhâr bula dingin ka kik hi; tu pawhin ka aw hriaa kawng a hawn chuan, a hnênah ka lût ang a, a hnênah zanriah ka ei ang a, ani pawhin ka hnênah a ei bawk ang.

Zilh loh fa chuan nun kawng ṭha a hre ngai lo. Pathian fa nihna nei tawh te chuan zilhna hi kan chan tûr a ni. Zilhna hi hmangaihna vânga thiltih anih chuan a dawnsawn pawh a nuam ṭhîn a, zilhhauna leh thununna kan dawn erawh a ṭha lam a kan hman ve hi kan tih tûr a ni.

Krista Thlarau Thianghlim chuan kan nunah lal nihna, thuneitu nihna hi neih a duh reng a, mahse, mi a tilui ngai lo. Kan duhthlanna a nghâk zâwk a ni. kan thinlung kawngkhâr hi a lo kik reng a, kan duhthlanna hmanga kan thinlung kawngkhâr lo hawnsak ve a… ‘Isu kan hnênah lo chêng la, min awmpui rawh’ tih hi kan tih tûr a ni.

I chhûngah ka lo lût ang e
I thinlung kawng min lo hawn rawh
Tiin min dîl fo ṭhin.

Pathianin a thu malsâwm rawh se.