A TÂWP THLENGA TUAR PEIH

MATTHAIA 24:9-13
Nimahsela, a tâwp thlenga tuar peih apiang, chu mi ngei chu chhandamin a awm ang.

Lal Isua khân a zirtîrte hnênah tihduhdahna leh dodâlna an tawh tûr thu a lo hrilh lâwk diam tawh a. A hrilh ang ngeiin Kohhran hmasa hunah khan Juda-ho aṭang leh Rom sorkar aṭangin tihduhdahna râpthlâk tak tak vawi eng emaw zât an tuar a. Juda hovin Stephana kha lungin an dêng hlum a, Kristian martar hmasa bera sawi a ni a. A thih dâwn ṭêpah pawh, “Lalpa, hei an thil tihsual hi an chungah mawh phurhtîr suh ang che,” (Tirh. 7:60) tiin ṭhingṭhiin amah lunga dêngtute tân a ṭawngṭaisak a ni.

Tûn thlengin khawvêl hmun hrang hrangah Lal Isua an rin avânga martar an la awm reng a. Zirtuten an chhût dânin ni tin Kristian martar 470 vêl khawvêlah awm ziah ang a ni. Kan India ram chhûngah ngei pawh tihduhdahna a nasa ta hle mai. Tuartute tân ṭawngṭai zêl ila. Hetiang boruak hi i chungah pawh thleng thut thei ve tho a ni a. Lal Isua hming i ṭan avâng hian i nun i chân ve ngam ang em? A tâwp thlenga tuar peihte chauh chhandamin an awm dâwn a ni tih hi i hre reng dawn nia.