THINUR REI LOH

EPHESI 4:26
Thinrim ula, sual erawh chu sual suh u; in thinur chu niin tlâkpui suh se.

He thu hi Tirhkoh Paula’n kristiante nun dân tûr a sawi zînga mi a ni. Mihring zîngah thinchhe deuh leh zaidam deuh a awm theih a, thinur ngai rêng rêng lo chu sawi tûr an vâng hle. Tirhkoh Paula hian thinur ṭhin kan nih a hriat chian êm avângin ‘thinur suh u’ ti lovin, ‘in thinur chu niin tlâkpui suh se’ a ti mai zâwk a ni. He mi awmzia nia lang chu ‘in thinur pâi reng suh u’ tihna emaw ‘thinur ṭhin mah ula, lungawi leh thuai ṭhin rawh u’ tihna a niin a rinawm.

Kan nupui, kan pasalte chungah te, kan tu leh fate chungah te, kan ṭhiante leh tu chungah pawh thinur pâi reng lo tûrin Paula hian min zirtîr a. Hmêlmate pawh ngaidam theitu, Lal Isua ringtu kan ni a. Kan chunga thil tisualtute ngaihdam theihna kan neih chuan kan thinur pawh a rei dâwn lo va, kan ngaihdam theih loh erawh chuan kan thinur hi niin a tlâkpui mai ni lovin, a rawn her chhuahpui leh dâwn a ni. He kristian nun dân ṭha hi i hmang ve nghâl ang u.