THIL ṬHA TAK TIH

MARKA 14:6-8
Isua erawh chuan, “Eng mah tih suh u; engah nge in tihbuai ni? Ka chungah hian thil ṭha tak a ti a ni. Mi retheite chu kumkhuaa in hnêna awm an ni a, in duh hun apiangah anni chu in khawngaih thei si a; kei erawh chu kumkhuaa in hnêna awm tûr ka ni lo. A tih theih tâwk a ti a ni; ka taksa hi phûm tûrin a lo hnawih lâwk a nih hi.

He thu hi hmeichhe pakhatin hriak rimtui to tak tikeh a, Isua lua a leih chungchânga zirtîrte phunchiarna thua Isua thusawi a ni a. He hmeichhia hian a tih theih tâwk thil ṭha Isua tân a ti a, Isua pawh a lâwm hle a ni.

Khawvêla lo piang zawng zawngte hian kan dam chhûngin kan nunin mahni chanchin ni tin kan ziak zêl a. Chanchin ngaihnawm tak ziak an awm laiin ngaihnawm lo tak ziakte awm a ni bawk a. Kan chanchin ziah tingaihnawmtu chu kan dam rei leh rei loh lam ni lovin, kan thiltihin a ni ber. Khawvêla kan dam chhûng hian mahni khua leh vêng tân emaw kohhran tân emaw thil ṭha tak pakhat tal tih kan nei em? tih hi inzâwt hlawm ila. Kan thih hnuah pawh miten min hriat rengna tûr hi a chhe lam ni lovin a ṭha lam ni ngei rawh se.