KA THU HRETUTE IN LA NI ANG

TIRHKOHTE 1:8
Nimahsela, Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” a ti a.

Thuhretu chuan mi hnên aṭanga a hriat ni lo, ama hriat ngei a sawi tûr a ni. A nunin a lantîr ngei tûr a ni bawk. Grik ṭawngah chuan thuhretu tih leh martar tih hi thu thuhmun a ni a, chuvângin thuhretu chuan thih pawh a huam ṭhin. Zirtîrte khawvêlin a ngaihsân lêm lohte kha thuhretuah Isuan a thlang hi a ropui. Keini pawh Krista palai kan ni (2 Kor. 5:20).

Kristian zawng zawng thuhriltu an ni vek lo; amaherawhchu, kan zain thuhretu, Krista aia palai ni tûra koh leh ruat kan ni.

A hnathawh chhunzawm zêl tûr tu nge awm?
Kei hi min thlang ta, ka Lal Isuan;
Lâwm chungin Lalpa rawng ka bâwl ang a,
Thih thlenga rinawm tûrin.

Lalpa’n thuhretu leh Krista aia palaiah min ruat ṭheuh a ni.