MI DANG REMTU NIH

ROM 14:19
Chutichuan, inremna tûr leh intihsâwt tawnna tûr thilte chu i ûm ang u.

Lal Isua leh a zirtîrten zanriah an kîl lâi lem ziaktu hi Leonardo da Vincy-a a ni a. He zanriah hnuhnûng an kîl lâi lem a ziah chhoh lai vêl hian vawi khat chu a ṭhianpa nên an inhnial chiam a. An inhnial hrep hnua a thil ziak lai chhunzawm leh tûra a dawhkâna a han ṭhut leh chuan a chhunzawm hlei thei ta rêng rêng lo mai a. A hmâ lawka a ṭhianpa a hauhna avâng chuan a inthiam thei ngang lo va, a thil ziak chu chhunzawm hlei thei chuang dâwna a inhriat loh avângin a tho va, a ṭhianpa chu a zawng chhuak a, a hnênah ngaihdam a dîl a, an inrem hnu chuan a ziak chhunzawm leh thei ta chauh a ni.

Kan mihring puite nêna inrem hi a pawimawh hlê a. Inrem loh chuan khawvêlah hian nuam taka khawsak theih a ni lo. Kan Lal Isuan vân leh khawvêl inrem lo a kraws thisen hmangin inremna min siamsak a. Amah ringtute chu mi dang rem ve thei tûra beisei kan ni. Mi dangin min rem theih loh pawhin keimahni lam talin kan rem theih a pawimawh. “A theih phawt chuan nangmahni lam tal, mi zawng zawng nên inremin awm rawh u,” tiin Paula vêkin min chah a ni (Rom 12:18). Mi dangte remtua ṭan hmasak hi mi huaisen tih dân a ni.