SUAL SUALA THUNGRULH LOH

ROM 12:17
Tu sual pawh sualin thungrûl suh u. Mi zawng zawng ngaiha thil mawi ngaihtuah lâwk rawh u.

October 27, 2010 zîng khawvâr hmain rûkru pakhatin kan ei rawngbâwlna thuk, gas bûr, gas lighter leh ka nupui tarmit a ru a. Mihring rilru lam aṭanga han ngaihtuah chuan zawn hmuh a, kut han thlâkte pawh a châkawm ve rum rum a. Mahse kan Lal Isuan nun dân ṭha min zirtîr tam tak zîngah khân, “Biang lehlama bêngtu che chu lehlam pawh dawh rawh; tin, i puan lâksaktua hnênah chuan i kawr lâk pawh hnial suh,” (Lk. 6:29) tihte leh “Mi an bawhchhiatte in ngaihdam chuan, in Pa vâna miin a ngaidam ve ang che u. Nimahsela mite in ngaihdam si loh chuan, in Pain in bawhchhiatte a ngaidam bîk lo vang,” (Mt. 6:14,15) tihte kan hmu si a, sual suala thungrulh duhna lam chu dah kian tûr a lo ni zâwk si.

Rûkru na nânâ chu tupawhin kut lo thlâk deuh pawh ni se âwma ngaihna mi tam tak rilru aṭang chuan a awm mai ṭhin. Amaherawhchu, ringtuten kan hriatreng tûr nia lang chu ‘Lal Isua ni se engtin nge a tih ang’ tih hi a ni a. ‘Mi zawng zawng ngaiha thil mawi ngaihtuah lâwk rawh u’ tia Paula’n min hrilh te hi hriatreng a ṭul. Pathian thu – kan kê atân khawnvâr, kan kawng atân êng a nihna a taka kan hman hun tûr a ni.