HLIMNA

THUHRILTU 3:12-13
Hlim taka awma, an nun chhûnga thil ṭha an tih aliama an tâna ṭha zâwk eng mah ka hre lo. Tichuan, mi tin ei leh in leh an thawh rimna zawng zawnga hlim taka an awm chu Pathian thilpêk a ni.

Kan han chhiar aṭang khân hlim hi Pathianin min duhsakzia kan hria a. Hlim hi taksain a ngeih a, damdawi ṭha tak a tling. Thufingte 15:13-ah chuan, “Thinlung hlimin hmêl hlim a siam a, thinlung lungngaihna erawh chuan rilru a tilungchhe ṭhin,” a ti a.

Rilru hlim nei tûrin thil pawimawh tak tak pahnih tih tûr a awm a, chûngte chu Lalpa ṭih leh thawhrim a ni. Miin Lalpa a ṭih chuan sual a kalsan a, mihring rilrua harsatna leh natna tam tak thlentu sual ber a kalsan chuan a rilru a lo hrisêl a, mi a hlim ṭhin. A dawt lehah chuan mahni tâwka thawkrimte hi an thawh rah seng tûr an neih avângin an rilru a hlim tlat zel nia. Thawkrim peih lo chuan thawh chhuah seng tûr a neih ve loh avângin a hlim ve tak tak thei ngai lo.