PA DINHMUN LEH MAWHPHURHNA

EPHESI 5:23-24
Krista chu amah ngei taksa chhandamtu nia, kohhran lu a ni ang bawk hian, pasal chu nupui lu a ni si a. Chutichuan, kohhranho Krista hnêna an intulût ang bawk hian, nupuite chu engkimah an pasalte hnênah intulût rawh se.

Pathianin mihring a siam dânah mipa hi lu zâwk chan chang tûrin a siam a. Bible-ah pawh thlahtu chhuina lamah mipa hming târlan a ni deuh vek a. Hnam thu-ah pawh hian pa hnam chhawm a ni deuh vek tih theih a ni.

Pa chu chhûngkaw thlahtu leh phuar khâwmtu a ni a. Sakhuana thu-ah pawh puithiam hna thawktu tûr a ni. Hetiang tak hi pa dinhmun a nih avângin a nupui fanaute tân pawh hlimna kulhpui leh thlamuantu ṭha a nih a pawimawh. Mahni intodelhna rilru pu mi, chhûngkaw zawm tlâk rorêltu leh patling, innghahna tlâk a ni bawk tûr a ni. Patling chu a rilru a nghet ṭhin a, a thu a thlâk zut ngai lo.

Chhûngkuaa pa dinhmuna ding mêkte hian kan mawhphurhna kan tiṭha tâwkin kan inhria em le?