NU DINHMUN LEH MAWHPHURHNA

THUFINGTE 31:27-28
An chhûng khawsak dân a en ṭha a, Dâwngdahna chhang a ei lo. A fate chu an tho va, “Engthâwli” an ti a; A pasal pawhin a fak a.

Abraham Lincoln-a chuan, “Ka bat hi tlâk dâwn ila, ka nu laka ka bat hi ka tlâk huphurh ber a ni,” a ti.

Nu hi chhûngkaw uap lumtu, chhûngkua tichhûngkuatu a ni. Inlêng leh mikhual neih chungchângah te, chhûngkhat leh laina hnâiah te leh inṭhenawm khawvênna thleng pawhin nu hi boruak chhia leh ṭha siamtu a ni. Fate tân chauh ni lovin, pa ber tân pawh nutling a nih a pawimawh. Ze ṭha leh ṭha lo te, awm dân mawi leh mawi lo te pawh hi faten pate hnen aṭanga an lâk aiin nute hnên aṭanga an lâk chhâwn hi a tam zâwk niin mi thiamten an sawi ṭhin.

George Herbert-a chuan, “Nu ṭha tak pakhat chu zirtîrtu za khat tluk a ni,” a lo ti hial rêng a ni.