RINGTUTE AWM DÂN

TIRHKOHTE 2:47
Pathian an fak a, mi zawng zawng lawm zâwngin an awm ṭhîn. Tin, a chhandam mêk apiangte chu Lalpan ni tin an hnênah a teltîr zêl ṭhîn.

Ringtu hmasate Chu rilru hmun khat puin Tirhkohten Isua thu an zirtîr an ngaithla ṭhîn. An inpâwl khâwm a, ringtu inkârah inlaichînna ṭha tak an nei. Chhang phelin an ei ho ṭhin a (Lk 22:19), ṭawngṭai an uar bawk. Khawvêl an hmachhawn hmain Pathian hnênah an ṭawngṭai a, huaisenna leh chakna an nei.

Kohhran hmasaten mahni aiin mi dang mamawh an ngaihtuah a, ringtharte chu ni tin an lo tel thar ve zêl a. Ringtu hmasate hian harsatna hrang hrang tâwk mah se, an hlimin an lungawi a, an entawntlâk khawp mai. Ringtu hmasate hre rengin Lalpa thu zâwmin ringtu nun dân ṭha i zâwm zêl ang u.

Kan Pa ṭhutphah hmaah,
Lungruala kan inkhâwm;
Kan tum, kan beisei a luang za,
Lâwmin kan lo khat hlawm.

Engkim Lalpa ta a ni a, a rawngbâwl nân i pe ang u.