ISUA HNÊNAH AN AWM
TIRHKOHTE 4:12-13
Mi dang tu ma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” a ti a. Tin, Petera leh Johana huaizia chu an hmuhin, lehkha thiam lo leh mâwl tak an ni tih an hriatin mak an ti hle a; Isua hnênah an awm tawh tih an hre ta a.
Zirtîrten Thlarau Thianghlim a lo thlenin thiltihtheihna nên rawng an bâwl a. Peteran Sanhedrin hmaah Isua a ṭan a, ‘tu ma hnênah chhandamna a awm lo,’ tiin huai takin a sawi.
Sanhedrin ho hi khawtlânga mi challang leh hausa an nih bakah, Saddukai, Pharisai leh puithiam lal chite ho an ni. Peteran thu a sawi hian a lu a zuar tih a hrethiam, mahse hlau hauh lova thu a sawi hi a ropui hle. An thusawi ngaithlatute chuan an huaizia chu an hmuhin Isua hnênah an awm tawh tih an hre ta a.
An chhinchhiah bîk che, i chêtzia an thlîr,
I sawi apiang an ngaithla;
Chhandamtu chu nangmahah ên chhuahtîr la,
A thu thuin ni tinin awm rawh.
Isua hnênah kan awm tawh tih an hre ve thei ang em?
