INPUMKHATNA

JOHANA 17:11
Tin, kei zawng khawvêlah ka awm tawh lo vang, hêngho erawh hi chu khawvêlah an awm ang, kei i hnênah ka lo haw dâwn ta. Ka Pa thianghlim, nangin kei mi pêkteho hi i hmingin hum rawh, pumkhat an nih theih nân, keimahni ang bawk hian.

Johana 17-hi ‘Puithiam Lal ṭawngṭaina’ tia sawi a ni a. Lal Isuan khawvêla a rawngbâwlna a zawh dâwn hnaiha a pa hnêna a ṭawngṭaina a ni. A zirtîrte ngei pawhin inpumkhatna an mamawhzia a hai lo. A chênchilh lai pawha an mamawh chuan vâna a lawnsan hunah phei chuan an mamawh lehzual dâwn tih a hre sa a. Amah la ring tûr zawng zawngte pawhin an mamawh dâwn tih hriain a dîl a ni.

Lal Isua ṭawngṭaina tihlawhtling tur hian mi dangte rem thei tura inngaihtlâwm a pawimawh hle ṭhin. Mizoramah kohhran pâwl hrang hrang kan tam hle a. Thurin lamah kan inpumkhat theih chiah loh pawhin inpumkhatna ṭha tak a neih theih tho. Berâm inrûksak duhna rilru kan pu ṭhinte leh pâwl dangte er zâwnga hmalâkte hi Lal Isua lawm zâwng a ni ang em aw?