INṬHENAWM KHAWVENNA

EPHESI 4:25
Chutichuan, dâwt sawi bânin, mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a.

Kan pi leh pute thufing pakhat chuan, “Ṭhenawmte do aiin khaw sarih do a thlanawm zâwk,” a lo ti a. Hei hian inṭhenawm khawvênna pawimawhzia a târ lang chiang hlê mai. Kan thisen zawmpui kâr hlâa mite aiin kan ṭhenawmte hi chhiatni ṭhatniah leh rikrum thilah kan tân ṭanpuitu ṭha leh ṭangkai an ni. Hetiang taka pawimawh a nih avâng hian a ni ang kan Lal Isua pawhin, “Nangmah i inhmangaih angin i vêngte pawh i hmangaih tûr a ni,” (Mk. 12:31) a lo tih ni!

Kan ṭhenawmte hi kan huphurh tûr a ni lo va, thil ṭha kan duhpui zâwk tûr a ni a; bum lovin an hnênah thu dik tak kan sawi ṭhin tûr a ni. Mahni hmasialna khawvêla kan tlân mêk lai hian ṭhenawmte huphurh reng rengin kan awm ang tih a hlauhawm hlê. Ei Ieh in leh thil dang dangah pawh ṭhenawmte nêna in ban tawn kan chîn a pawimawh. Ṭhenawmte tâna hnawksaka awm loh hi Kristiante tih tûr pawimawh tak a ni.