LAL ISUA A LO KAL LEH DÂWN

TIRHKOHTE 1:10-11
Tin, a chhoh laia vân lam an en reng laiin mi pahnih, puan vâr sinin an kiangah an lo ding a; chu mite chuan, “Galili rama mite u, engati nge vân lam ena in din reng? He Isua, in hnên ata vâna hruai chhohva a awm hi, vâna a chho in hmu ang bawk hian amah ngei hi a lo kal leh ang,” an ti a.

I âwih emaw âwih lo emaw, Lal Isua hi a lo kal leh dâwn. Vâna a lâwn lai ngeia mi pahnih puan vâr sinin a lo kal leh tûr thu an sawi hi a dik dâwn.

Lal Isua lo kal tûr thu hi mi ṭhenkhatin an awih lo va ‘Pentikos nia Thlarau Thianghlim lo thleng kha a lo kal lehna alâwm’ tia ngaite an awm a. ‘Kan pian thar hi keimahnia Lal Isua a lo kal lehna chu a ni’ tia ngai tâwkte pawh an awm bawk. Mizo lehkha thiamte zîngah ngei pawh Lal Isua lo kal leh ring lo sawi tûrte pawh an awm nual niin a hrechiangten an sawi bawk.

Kan Bible-in a sawi hi a dik dâwn a. Kan ngaih dan leh hriat dan tlemteah hian a innghat dâwn lo. ‘Pakhat leh pakhat belh chu pahnih a ni’ tih a dik ang hian Lal Isua a lo kal leh dâwn tih hi thu dik awmsa a ni. I inpeih tawh em le?