INLAMLET

MATHAIA 18:3
Thu dik ka hrilh a che u, in inlamlêta naupang tê ang hi in nih loh chuan vânramah in lût tawp lo vang.

Mi 1000 chuang Pathian hnêna hruai thlengtu thuhriltu lâr, Dr. R.A Torrey-a kha a tleirawl chhuah laiin Pathian hawisantu, khawvêl nawmna chêna vak bo a ni a. Pathian leh Bible rinna pakhatmah nei ngai lo kha a ni. Mahse a nu ṭawngṭaina leh Pathian hnathawh avângin khawvêla thuhriltu lâr berte zînga mi leh Pathian hman berte zînga mi a lo ni ta hial a ni.

A tleirawl laiin ni khat chu a nu hnênah, “Ka sualna leh i ṭawngṭaina ka hre peih tawh lo, ka kal bosan che ang a, ka tibuai leh tawh ngai lo ang che,” a ti a. A nu chu a lungngai êm êm a, tihngaihna a hre si lo, “Ka fapa, kawng dik lo i zawh a ni, i kawng zawh lai hi a lo tâwp hunah leh beiseina rêng i neih tawh loh hunah chuan i thinlung zawng zawngin i nu Pathian hi au la, ani chuan a rawn ṭanpui ang che,” a ti a. Khawvêl nawmna chên tûrin Torrey-a chu a tlanbo ta a ni.

An in a chhuahsan hnu chuan Torrey-a chu hmun hrang hrangah a awm kual a, sual kawng zawhin a sualna pawh a thûk tawh hle a. A duh leh nuam a tih apiang tiin a hun a hmang zo a, mahse hlimna leh lâwmna tak tak te, thlamuanna te a nei thei ta hauh lo mai a. Mal ngawih ngawiha inhriain a khawvêl nun a lo beidawng ṭan a, zânah a muhil thei lo a, chhûnah pawh a muhil thei bawk si lo, a nun chhûngril mai piah lamah a taksa a chau zo ta.

Zan khat chu hotel room pakhata amah chauhva a awm chu inkah hlum a tum a, chutih lai tak chuan a nu thusawi kha a hrechhuak a, a au ta a, “Lalpa, ka nu Pathian, i awm a nih ngai chuan i ṭanpuina ka mamawh e. Min ṭanpui chuan ka zui ang che,” a ti a.

Chu dârkâr chuan Pathian chuan a khawih danglam nghal a, vawiin thlengin misual ngaidamtu, kan Pathian hnung a zui ta a ni.