BUH SENG RAWH KHAI

MATHAIA 9:37-38
A zirtîrte hnênah chuan, “Buh seng tûr a tam tehlul nên, thawktu lah an tlêm si; chutichuan, a buh seng tûra mi tîr tûrin buh neitupa dîl rawh u,” a ti a.

Anglican rawngbawltu Chad Varah chuan kum 1953 daih tawh khan mitthi a vui a. A mitthi vui chu hmeichhe kum 18 mi niin mahni intihlum a ni a. Mahni intihhlum chungchang zirtute chuan chu hmeichhia chuan harsatna nasa tak a tawk a ni tih an hmuchhuak a, chuvanga intihlum a ni, an ti a ni.

Chad-a chuan chu a harsatna chu hriatsak se chuan a pui theih ngei a inring tlat a. Chu hmeichhe thihna chuan nasa takin a nun a sawinghing a, a haw hnu chuan Pathian hnenah a ṭawngṭai a, harsatna tam tak neite ṭanpui turin kawng hawnsak turin a dil a ni.

Chad Varah ṭawngṭaina chu Pathianin a ngaihthlaksak a, remchang a siam sak ta a. London khawpui-a an Kohhran aṭang chuan hna a ṭan ta a. Harsatna nei apiang tan chawlhkar-tin an Kohhran Telephone-ah amah biak theihna hun a hawng ta a. Chutianga harsatna nei an awm chuan a biak theih thu chanchinbu-ah te a chhuah ta bawk a. A vawikhatna-ah chuan a rin phak bâkin rawn phone an tam em em a, mi 29 laiin an harsatna an rawn thlen a ni.

Hmalakna zau zawk a ngai tih hriain midang a sawm belh a, nitin darkar 12 chhung chutiang harsatna thlen hun chu an hawng ta a. Tichuan ram hrang hrang-ah ‘Lifeline’ pâwl a lo din phah ta hial a, nunna tam tak an chhan phah ta bawk a ni.

Midangte tana nunna chhanhimtu ‘Lifeline’ kan ni ve thei. Tisa chhanhimtu mai niloin thlarau bo chhanchhuahna tura hmanrua ni tur thlengin Pathianin min ko a ni. Chutiang rilru chu pu ve ila, kan phak ang tawkin i thawk ṭheuh ang u.

1 PETERA 3:9 – Sual sualin thungrûl suh ula, ânchhia pawh ânchhiaa thungrûl lovin, malsâwm hlauh zâwk rawh u; malsâwmna dawng tûrin asin Pathianin a koh che u.