GIDEONS

MATHAIA 18:20
Mi pahnih emaw, pathum emaw ka hminga an ṭhut khâwm apiangin an zîngah ka awm si ṭhîn a,” a ti a.

September ni 14, 1898 daih tawh khân Central Hotel of Boscobel, Wisconsin-ah John Nicholson-a chu thleng tûrin zân dar 9 vêlah an inpulût a. Mahse room âwl rêng a lo awm tawh lo a. Clerk pakhat chuan room no. 19-naah mi pakhat Samuel Hill-a bulah awmna a awm thu a hrilh a, tah chuan a inpulût ve ta a ni.

Zân a mut hma chuan a naupang têt aṭanga a nuin mut dâwnah Bible chhiar ziah tûra a tih angin John Nicholson-a chuan a Bible a keu a, a chhiar ta a. Samuel Hill-a chuan kristian a nih ve tho thu a hrilh a, a rî-a chhiar tûrin a ngên a. A rî-a a han chhiar chuan Pathian hnathawh ropui tak an chungah a lo thleng ta a ni.

John Nicholson-a chuan Johana bung 15 chu a chhiar a, an pahnih chuan ṭhingṭhiin an ṭawngṭai dûn ta a. Zing dâr 2:00 thleng Pathian thusawi inpâwlna hun an nei a ni.

An pahnih chuan May thla-ah Beaver Dam, Wisconsin-ah inhmu lehin kristian pâwl ṭha tak din an tum ta a. Tichuan July ni l, 1899-ah John Nisholson-a, Samuel Hill-a leh an ṭhianpa pakhat, Will J. Knights-a te chuan Association of Christian Salesmen an din ta a ni.

Anni pathum chuan theihtâwpin kristian thilte chu an thehdarh ta a. An pâwl hming chu an phuah ṭha a, an ṭawngṭai hnu chuan Knights-a chuan, “GIDEONS tih kan phuah a ngai a ni,” a ti a. Lungrual takin an pawm ta a ni.

Kum tam tak a liam hnu vawiinah chuan Gideons chuan khawvel ram hrang hrang 100 chuangah a thlâwnin Bible maktaduai 750 chuang an sem chhuak tawh a ni.

Eng kawng emaw talin Lalpa tân bul kan ṭan ve thei em le!

2 TIMOTHEA 4:5 – Nang zawng engkimah inthunun la, tuar fan fan rawh; Chanchin Ṭha hril hna hi thawk zêl la, i rawngbâwl hna kha hlen rawh.