SUAL HNEHNA

1 PETERA 3:9
Sual sualin thungrûl suh ula, ânchhia pawh ânchhiaa thungrûl lovin, malsâwm hlauh zâwk rawh u; malsâwmna dawng tûrin asin Pathianin a koh che u.

Mathaia 5:44,45-ah chuan hmangaihna ropui tak nei turin hetiang hian Lal Isuan min hrilh, “Kei erawh chuan ka hrilh a che u: i hmêlmate chu hmangaih la, a tiduhdahtu che chu ṭawngṭaisak rawh, in Pa vâna mi fate in nih theih nân ani chuan mi sualte leh mi ṭhate chungah ni a chhuahtîr a, mi dik leh dik lote chungah pawh ruah a surtîr ṭhîn.” tiin.

Communist hunlai khan Romania ramah naupang kum 12 mi hian communist sipai hnenah chuan an Captain hmuh a rawn dil a. Chu naupang chuan pot-ah pangpâr mawi tak a ken avangin sipai chuan captain a pêk tur nih ringin a luh tir a.

Naupang chuan captain hnenah chuan, “Ka pu, Captain, nangmah hi ka nu leh pate mantu leh tiduhdahtu kha i ni a. Vawiin hi ka nu piancham a ni a. Naupangtê ka nih aṭangin ka nu pianchama pangpâr pêk hi ka tih ṭhin a ni a. Mahse vawiin-ah chuan pangpâr pêk tûr nu ka nei ta si lova. Ka nu kha Kristian a ni a, thil kan hriat ṭan tirh aṭangin ka nu chuan hmelmate hmangaih tur leh sualna chu ṭhatnaa thungrûl tûrin min hrilh ṭhin a. Chuvangin i fate nu chu khawngaihin ka pe thei ang em? chu chuan a tilâwm ve ang em? min lo pêk sak thei ang em?” a ti a.

A nu leh pa thattu Communist captain thinlung chu tihnghinin a awm a, a mittui a luang hial a. Chuta ṭang chuan Kristiante a tiduhdahin a that tawh ngai lo a, hun a lo liam zel hnu-ah phei chuan Kristianah a inlet a, a sipaite ngeiin tân inah an khung ta zâwk a ni.

ROM 12:21 – Sual ngam chein awm suh la, ṭhatnain sual chu ngam zâwk rawh.