PUMPELH THEIH LOH

JOHANA 1:12-13
Mi ṭhenkhat erawh chuan an lo lâwm a, amah an ring a, an hnênah Pathian fate nih theihna a pe a. Chûng mite chu thisen hrin an ni lo va, tisa duhzâwnga hrin pawh an ni lo va, mipa duhzâwnga hrin an ni hek lo, Pathian hrin an ni zâwk e.

Vânram thleng tûrin pumpelh dang a awm lo a. Pumpelhna awmchhun chu piantharna a ni.

Kum tam tak liamta khan Rosie Ruiz chu chanchinbu headline-ah a thlalâk nên a lang chuai chuai a. US-a Boston Marathon neih tawh zawng zawnga tlan chhuak thei zînga hmeichhe awmchhun anih vang a ni.

Chutihlai erawh chuan a tlânpuite chuan Rosie-in a tlânpelh lai reng reng an hre lo a. An tlânna kawng ngaihtuahin khâm kâr leh kawng kawi tak takte anih avangin inhnial theihna lian tak a awm rêng a.

Mite chuan Boston Marathon a tlân hma-a New York Marathon a tlânna-ah pawh pumpelha a kal thu an sawi luai luai a ni. Tichuan Rosie Ruiz chuan Boston Marathon lawmman dawng tûra dawhsâna a lâwnlai chuan mipui tam takte chuan, “Bumtu!” tiin an lo au ṭhup ṭhup mai a. A hming pawh nasa takin a chhiat phah a ni.

Hetiang deuh hian mi tam tak chuan Vânram kâi tûrin pumpelh an zawng a, rinhlelhawm takin an nun an hmang a, Vânram kâi an tum êm êm tho ṭhin. Mahse Lalpa’n a lo lâwm lût thei ang em le?!

Ani chuan, “Tihtakmeuhvin, tihtakmeuhvin ka hrilh a che, mi tu pawh an pianthar loh chuan Pathian ram an hmu thei lo vang,” a ti a… “Thu dik tak ka hrilh ang che, tuiah leh thlarauva piang lo chu tu mah Pathian ramah an lût thei lo vang.” a ti. (Johana 3:3 & 5)

Isua’n, “Tih tak meuhin, tih tak meuhin…” a tih hi hre reng ang u. A ti takzet tih a lang chiang hle.

JOHANA 3:36 – Tu pawh Fapa ring chuan chatuan nun an nei tawh; Fapa thu awih lo chuan nun an nei lo vang a, an chungah Pathian thinur chu a awm reng zâwk a ni.