GLADYS AYLWARD

ROM 10:15
Tirh an nih si loh chuan tu nge hril ang? “Thil ṭha chanchin rawn hriltute ke chu a va mawi êm!” tih ziak ang khân.

Gladys Aylward tumruhna chuan khawvel mite nun a khawiha, China rama chanchinṭha hril ṭulna an hriat phah a, mi tam tak rilru leh ngaihtuahna chuan China ram a hawi phah a, nasa takin China rama Chanchinṭha puang darh turin an chêt chhuah phah ta a ni.

Gladys chu kum 1902 ah England-ah a piang a. Chhungkaw harsa tak an nih avangin zirna mumal a nei lo a. Kum 14 a nihin dâwr nghâkin a inhlawh ṭhin a. Kum 18 a nihin a piangthar a, a hun zawng zawnga Pathian rawngbawl turin a inpe ta a, chanchinṭha hrilh ngai lohna ram thim taka kal chu a châk ber a ni ṭhin.

China rama chanchinṭha hril tura Pathian kohna chu China Inland Mission-in an mit a tlun tâwk loh avanga an tirh tâk loh ni mah se a beidawng lo a, Pitar kum 73-a upa, Pi Jennie Lawson nen intawngin China ram an pan rawih a. Kum 1932-ah China ram Yangcheng khua an thleng ta a ni.

Theihtawpin chanchinṭha an hril a, Pi Jeani chuan a boralsan ta mai a. Mahse beidawng lovin khawhar takin chanchinṭha a theih ang angin a hril zel a, kum 1936 ah China khua leh tui nihna ‘Citizenship’ a nei ta hial a ni.

Kum 1938-a Japanin China ram an beih khan fahrah naupang 20 leh sipai hliam tuar 30 vel zet a enkawl a. Mahse kum 1949-a China Sorkarin an ram chhuahsan tura Missionary-te a tih khan a chhuahsan ve ta a ni.

A rawngbawlna tlâwm tak behchhanin ‘The Inn of the Sixth Happiness’ cinema an siam a. Khawvel mite thinlung a khawih êm avangin mi tam tak China rama Pathian rawngbawl turin an inpêk phah ta a ni. Gladys chu kir lehin Taiwan-ah fahrah enkawlna a hawng a, tah chuan kum 1970, January ni 3 khan Lalpa hnenah a chawl ta a ni.