KHAWVEL TUIPUI ZAU

LUKA 21:34-35
Tichuan, nawmsak bâwl te, zu ruih te, ni tin khawsak engtona te in rilrua a khah lutuk loh nân fîmkhur rawh u. Thanga âwk phut ang maiin a rawn nang dah ang che u. Lei pum pui chunga chêngte chungah chutiangin a lo thleng dâwn si a.

Lawng hi tuia awm tura siam a ni a. Mahse lawng chhungah tui a luh erawh chuan a ṭha lo va, a hlauhawm bawk a ni. Mihringte hi kan bawchhiatna avangin lei anchhedawnga awm tura tih kan ni a, mahse he lei anchhedawng leh bawlhhlawh tak hi kan thinlungah a luh erawh chuan chatuan boralna tur a ni.

He khawvela cheng reng chung hian nun himna hmun thleng turin kan fimkhur a ngai hle thung a ni.

Khawvelin a thinlungah hmun a luah vaih erawh chuan thihna leh chhiatna a thleng ang. Chuvangin Kristian chuan eng lai pawhin a thinlung chu chenna in atân buatsaihtu Pathian tân a zuah reng ṭhin tur a ni a, tichuan he khawvelah leh khawvel lo la awm turah pawh muang tak leh him takin a châwl ang.

Tui tel lo chuan a nun theih loh tih kan hre ṭheuh a. Mahse tuia kan pil erawh chuan kan thaw thei a kan thi mai dawn a ni. Chuvangin tui chu kan hman dawn leh kan in dawn apiangin a chhûnga kan tla lût tur lakah kan inveng tur a ni.

Chutiang chiah chuan khawvel thilte pawh hi kan mamawh atana hman tur a ni a. A tel lo chuan nun a harsa a ni mai lo a, a tel lova nun theih loh châng a awm a ni.

Hetiang chiah hian Pathian pawhin khawvel hi mihringte hman atan a siam a, mahse mihringte hi khawvelah kan tla lut tur a ni lo. Kan tlâk luh hun hunah ṭawngṭaina thaw a tawp ang a, inkhawm turin kan ke a bai anga kan boral mai dawn a ni. Chuvangin he khawvelah hian fimkhur takin kan nun kan hmang tur a ni a. Khawvel tuipui zau taka pil hi a hlauhawm takzet a ni.

LUKA 21:36 – Chûng thil lo thleng tûrte tuar chhuaka, Mihring Fapa hmaa in din theih nân eng lai pawhin ngaihvenin ṭawngṭai rawh u,” a ti a.