HIMNA

2 CHRONICLE 16:9
Lalpa chuan amah ring tlattute chu ṭanpui tûrin khawvêl pum puiah a mit a lên ruai ruai ṭhîn a ni. Tûn aṭang chuan do tûr i nei reng ang. Âtthlâk takin thil i ti a nih hi,” a ti a.

School/College/University ṭha tak tak a awm a, chung zirna in te chuan dan ṭha tak neiin naupang ṭhatna tur leh school ṭhatna turin kalphung nghet an nei ṭhin a. Thuawih taka school dan zawm ṭhin naupang chu a lo puitling a, hlawhtlinna nen miropui tak a lo ni ṭhin.

Traffic dan zawm hi thil pawimawh tak a ni a. Khawthlang lam ramah chuan motor-a chuang reng rengten ṭhutna-a inhrenna (Seat-belt) awm chu an hreng ngei ngei ṭhin a, chu chu an dan a ni a, an zawm ṭha hle. An chetsual palh pawhin chu chuan a veng fo ṭhin. India ramah pawh he dan hi hman a ni tawh a, mahse a tam zâwkin kan la zawm thei meuh lo. Dan zawm hi kan himna tur a ni si a.

Mizoram-ah phei chuan Traffic Police kan nei ṭha em em a, dan pawh kan nei ṭha a, mipuite pawhin kan zawm tlângpui a, zawm lo erawh an awm zeuh zeuh tih chauh a ni. Dan zawmte chu zawm lote aiin accident lakah an fihlim nge nge ṭhin bawk.

Daktawr-te hian damlo an tidam a ni mai lo a, hriselna nei turin nasa takin mipuite an ṭanpui a, ei leh in dan tur te, exercise lak dan tur te thlengin min hrilh ṭhin a ni.

Khawvelah hian dan zawm hi a har em em a, mi tam tak chu an luhlul avang te, an fimkhur loh avang te, midangte an ngaih pawimawh loh vang leh an sual hrim hrim vang pawh a ni ang.

Hetiang chiah hian Pathian thu-ah pawh kan awmdan tura Bible-a min hrilh ang te, kan tih tur leh tih loh tur te hi zawm tur a ni a. Khawvelin kan ṭhatna tura ruahmanna a siam kan zawm loh avanga thihna te, harsatna te kan tawh chuan Pathian thu awih loh avanga harsatna te, manganna te, buaina te kan tawh tur hi a râpthlak dawn hle a ni.

SAM 34:7 – Vântirhkohte chuan Lalpa ṭihtute chu An hual tlat a, an humhim ṭhîn.