BIBLE INHAWNG

JEREMIA 23:29
“Ka thu chu mei ang a ni a, lung chhutkehna tuboh ang hi a ni lo vem ni?” tih hi Lalpa thuchhuak a ni.

Pathian thu nihna ropui tak chu Hebrai 4:12-ah khan chiang takin kan hmu, “Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni.” tiin.

Tirhkoh Paula khan chanchinṭha a zahpui lo a, engtik lai pawha hril turin a inpeih reng a ni. Pathian thu thiltih theihna kha chiang takin a hria a, chuvangin a aia thildang chhuan tur a nei lo.

Ṭhianzaho nuna Pathian thu thlen dan hetiang hian Pastor pakhat chuan a sawi. Chawlhkar tâwp chu ṭhianzaho tan inkawmna hun thâwl nuam tak a ni a, zu an in ho a, pawisa an khêl ṭhin a, a thlengtupa nupui tân chuan a thaw ipik thlâk êm êm a, mahse a pasalte ṭhianho awmdan chu tihreh dan a thiam lo a, Pastor hnenah ṭanpuina a dil ta a ni.

Pastor chuan an inkawmna hmun dawhkanah chuan Bible inkeu dah ziah turin a hrilh a. Chutia a tih hnu chuan an zînga pakhat chu a rawn kal ve ta ngai lo a, tichuan an kiam ta pheuh pheuh a, a tâwpah phei chuan a pasal pawh chu a inhmuchhuak a, Pathian lam a hawi phah ta a ni.

An dawhkana Bible inkeu khan sual tihna hmun leh hun remchang chu a tibo a, Pathian ropuina leh thiltihtheihna nasa tak a luan tîr ta zâwk a ni.

Pathian thu chuan thinlung sak ber pawh a tikehsawm vek thei, sualna avanga beidawnna te, ṭha thei tawh lo a ngaihna te hi Pathian thu-a kan beidawnna tilangtu a ni a, sual Setana min bumna mai a ni.

EFESI 6:17 – Chhandamna chu lukhumah hmang ula; Thlarau khandaih, Pathian thu chu pai rawh u.