MIHUAISEN, CORRIE

KOLOSA 3:16
Krista thu chu, a hausakna zawng zawng nên nangmahniah chêng rawh se. Fakna hla te, Pathian hla te, Thlarau lam hla te nên finna tinrêngin inzirtîr ula, infuih tawn rawh u. In thinlung taka Pathian chawimawiin hlim takin zai rawh u.

Indopui II lai khan Nazi Germany-ah chuan Bible hi neih leh chhiar an phal reng reng lo a. An sawi dan pawh ‘Lehkhabu dawheh’ (Book of lies) tih a ni.

An mi mante an hnawhkhawmna hmun pakhatah chuan hmeichhia 700 lai an dah a. Khuahkhirhna nasa tak hnuaiah an awm a. An awmna hmun chu a tenawmin a hrehawm em em a, hrikhrah tam tak a awm a, chuvang chuan a vengtu pawh an lut peih zen zen lo a. Uluk takin a pawnah an vêng tawp mai a ni.

Corrie Ten Boom pawh chu tâng zîngah a tel a, kristian ṭha tak a ni. Vengtuten an mitâng awmkhawmna hmun hrehawm tak an luh duh lohna chu Corrie tan chuan remchang tak a ni.

Chu hmunah chuan mi tam tak an awm avangin Corrie chuan nikhatah hmun hnihah Pathian thusawina hun a nei ṭhin a. Tângmi mitam tak chu ringtu-ah a siam hman nghe nghe a ni.

Chutia ni tam tak rawngbawlna a neih hnu chuan tânin vengtu an thlâk tur thu an rawn hriattir a. Chu vengtu thar chu hmeichhe kawlh tak a ni a, tânina tângte awm dan dik lo reng reng chu an hotute hnenah a hêk ṭhin a. Corrie chuan huaisen takin Pathian thu a hril zel a, zêp a tum lo a, thup a tum bawk lo a, tân in vengtu pawh zah zo lovin miten Pathian an rin ve theihna turin a hma-a tih tur chu a ti pawp pawp mai a ni.

Nikhat chu vengtu chuan an thâwm a hria a, a rûkin a ngaithla a, mahse Pathian hnathawh a chungah a lo thleng a, an hla sak chu a ngaithla kham lo a, an sak zawh chuan an hmuh loh lam aṭangin, “Vawi khat tal han zai leh teh u” a rawn ti a. Tu nge an hre lo a, mahse tân in vengtunu sual tak mai kha a lo ni reng mai a. Corrie chuan chhandamna kawng hrilhin a piangthar ta a ni.

ROM 1:16 – Chanchin Ṭha hi ka zahpui si lo va, tu pawh a ring apiangte chhandam nâna Pathian thiltihtheihna a ni si a; Juda-te tân a ni phawt a, Jentail-te tân pawh a ni leh a.