VANRAM BANK

VANRAM BANK

2 PETERA 3:9
Ṭhenkhat rin dân angin Lalpa hi a thutiam hlen kawngah a muang lo ve; in tân a dawhthei a nî zâwk; tû ma boral a duh lo va, mi zawng zawngin an sual an sima, a hnêna an kîr a duh vâng zâwk a ni.

Kristiante kan vanneihna em em chu Pathian nung kan neihna hi a ni. A thutiamah a ding nghet tlat a, a nghing lo a, a buai lo a, engzata tam pawh nise a tiam tawhah a inchhir lo a, a sût leh ngai hek lo. Malsawmna leh lawmman min tiam hi a sâng em a, mihringte hian kan dawng seng lo zâwk a ni.

II Korinth 1:20-ah chuan, “Pathian thutiam zawng zawng chu amahah chuan, “A ni,” tih vek a ni;” tih kan hmu a. Hei hian kan Pathian rinawmzia a tilang chiang hle awm e.

Rev. William Chapman-a kha West Coast, America-ah Pastor hna thawk turin a insuan dawn a. A kohhran hmasa a chhuahsan hma chuan Kohhran member pakhat hi a hnenah a rawn kal a, Rev. William Chapman-a hnenah chuan lehkha vara intuam hi a rawn pe a. William Chapman-an a han hawn chuan cheque ziak loh in sign sa vek (Blank cheque) hi a lo ni a.

Chupa bank account cheque chu a ni a, Pastor hnenah chuan, “I mamawh zât tur ka hre lo a, chuvangin i mamawh zât pawisa i la chhuak mai dawn nia” a ti a. William Chapman-a chu a lâwm em em a, Pathian ṭhatna leh rinawmna avang niin a hria a ni.

Mihausa tak hnen aṭangin cheque signed sa ziah loh dawng ve ta ila engtiang takin nge kan lawm ve ang?!

Engpawh nise Vanram Bank kan nei a, chu Bank cheque chu Isua Kristan, Pa Pathian aiawhin a signed vek tawh a, Thlarau Thianghlim kaltlangin min pe ta a ni. Chu chu Bible-ah chiang takin kan hmu a. Engah nge kan mangan ang!

FILIPI 4:19 – Ka Pathian chuan Krista Isuaa a hausakna ropui tak aṭangin in mamawh tinrêng a pe ang che u.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy