A RING APIANG

JOHANA 3:16
Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.

Sadhu Sundhar Singh-a chuan tihian a sawi: “Vawikhat chu tlang rama ka zinnaah, lungpui chungah ka ṭhu hahchawl a. Ka chawlhna lungpui thlanga thing bukah chuan Sava bu a awm a. Nakinah chuan chu Sava pui chu a note te tana chaw rawn pu chungin a lo haw ta a. A note-te chu chaw a pêk zawh hnu-ah a thlâwk bo leh ta a ni.

Chu Sava note te mit chu a la keu lo a, engmah an la hmu thei lo. Mahse an nu lo kal thawm an hriat chuan a lo lawm a, an ka an lo âng vêl a ni. ‘Ka nu ka hmuh hma chu ka âng lo ang, ka nu nge midang pawh ka hre si lo a’ ti ta se, rilṭamin an thi ngei ang, a chhan chu an la hmu thei lo a. Mahse an nu chuan a hmangaih a ni tih an hria a, an ringhlel lo a, an tân chaw tak a rawn hawn dawn tih an beisei tlat a ni.

Rei lo te-ah an mit te chu keuvin an pui pawh chu a takin an hmu thuai dawn a, anni ngei pawh chu boruakah chuan thlain an la lêng vêl dawn a ni tih pawh an ringhlel lo a ni.” tiin.

Keini mihring, thilsiam zinga lu berte hian chung rannungte chu kan tluk em! Keini zawngin Pathian hi a awm tih leh min khawngaihtu a ni tih hi kan ringhlel tlat ṭhin. “Ka ring, ka pawm, rinhlelhna reng reng ka nei lo” kan tih lai hian kan thil tih aṭangin rin tak tak leh tak tak loh a lang si a ni.

Kan Lalpa chuan, Johana 20:29-ah khan, “Mi hmuh avângin mi ring a ni maw? Hmu lova ringte chu an nihlawh e,” a ti.

Pathian lama thinlung hawng tawh a, amah aṭanga thlarau lam chaw dawng tawhte chuan puitlin hun leh amah nena chatuana chenhona hun chu kan la tawng dawn a ni.

ROM 10:4 – A ring apiangte thiam chantîra an awm theihna tûrin, Krista chu Dân tibângtu a ni si.