IN CHHUANG

IN CHHUANG

2 KORINTH 12:9
Ani chuan, “ka khawngaihna i tân a tâwk e, ka thiltihtheihna hi chak lohnaah asin tihpuitlina a awm ṭhin,” mi ti a. Chuvângin, Krista thiltihtheihna chu keimaha a chên theih nân ka chak lohnate hi lâwm takin ka chhuang tawh zâwk ang.

Tirhkoh Paula’n chak lohna a nei a, chu a chak lohna chu a duhdan a ni bik hauh lo, a tihsual avanga Pathiana a chak lohna a ni thei a, mihring a nihnu-a a famkim lohna pawh a ni thei e. Mahse chu a chak lohna chu a chhuang tlat zawk si a ni.

Keini rawngbawltu tam takte hian chaklohna kan nei a, kan chaklohna te hi chhuan dan dikin kan chhuang em. Kan tih ṭhat duh loh avanga chaklohna hmatheh fo mi kan ni em!

Paula’n chaklohnaa lâwm a tih hi chak loh avanga lâwm hrim hrim a tihna a ni lo a, mahse chu tuarna, harsatna, tlin lohna chu kawng dangin a thlir a, chu chuan thil ṭha zâwk a thlenin emaw a tana Pathian remruatna kawng ropui zâwk a nih dan a zir thiamin a chhuang ta zâwk a ni.

Chakna-in Pathian hmel a hliah si chuan chhuan tur a ni lo a, chak lohnain Pathian hmel min hmuh tir anih chuan chhuan tur zâwk a lo ni.

HIV AIDS vei hmeichhe pakhat hi nun hrehawm takin a awm a, a bialpa nena sex an hman aṭanga kai a ni awm e. A bialpa leh a chhungten an hre lo a, amah lahin a hrilh ngam hek lo a, mahse chu natna tihdam theih loh, mualphona keng tel natna ni bawk si chuan beidawnna ruamah a hnuk lût a, mahni intihlum a tum mêk lai chuan Pathian a au ta tlat mai a, Pathianin a lo chhâng a, thlamuanna duhawm tak a pe a, a awmpui ta a. HIV AIDS veina ram aṭang chuan a piangthar a, chhandamna a chang ta si a ni.

Chu natna chu vei a ṭha e tihna a ni lo a, HIV AIDS hrik vei lo a pianthar loh ai chuan HIV AIDS avanga pianthar chu a ṭha a, piantharna hmanrua chu a chhuanawm a ni.

2 KORINTH 12:5 – Chutiang mi chu ka chhuang dâwn; nimahsela, ka chak lohnate lo chu mahni ka inchhuang dâwn lo.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy