THEIH TÂWP THLENGIN

– Zata Zadeng
Sialsuk

Mihringte hian chak châng te, chak loh châng te kan nei ṭhin a, chutiang hun ah chuan Pathian thu leh hla kan mamawh ṭhin a ni. Tunah hian Pathian fak hla hmangin a thu te kan ziak dawn a ni.

KHB NO. 155 Châng 1
Ka ke vêng la, thlîr hlat ka dîl lo ve,
Tlêm tê a tâwk – pên khat pawh ni mah se.

Pathian hmangaihna leh awmpuina hi kan mamawh reng a, mahse a hmangaih tlâka kan nun ve a ngai. Thil sual kan tih lohna turin leh sualna kawnga kê kan pên lohna turin. Pathian hnênah kan ke pên te min venhimsak turin leh min awmpui turin kan dîl mawlh mawlh tur a ni.

KHB NO. 142 Châng 6
Aw mawi chhiar sên loh nei ila,
Fak tâwk ka inring lo va;
Ka aw neih chhun lo mawi tâwp se
Ka tih hle hi, chawimawi nân.

Mi tam tak hi chuan aw ṭha tak kan nei lo ani mai thei, kei ngei pawh hian chhuan tur engmah ka nei lo. Mahse Pathian chuan aw mawi leh ṭha a thlang kher lova, theihtâwpa amah fak a, aw chhuah nasa apiang hi a duhin a thlang ṭhin a ni. Chuvangin, kan aw neih chhun ang ang te hi Lalpa tân ui lovin hlân ila, i zâi tuarh tuarh ang u, chu chuan kan nun a lo tichak bawk dawn a ni.

KHB NO. 163 Châng 2
Eng zâta tam nge ni?
Eng chena ril nge ni?
Ka sual zungzâm ka chhui phâk lo,
Lalpa, mi ngaidam rawh.

Mihringte hi kan sualna tam zia han ngaihtuah hian Pathian ngaihdamna chang tlâk lovah kan inngai a ni mai thei. Mahse chutiang chu a ni hauh lo, Pathian hian misual eng anga sualna nei tam pawh hi, inchhir a, sim a, a hnên an pan chuan a ngaidam thei vek a ni. Pathian hmangaihna thûk leh zau zia, sei zia leh ril zia hi mihringte tân chuan hriatfiah vek theih a ni lo. Kan pawm mai hi a tâwk. Lalpa min ngaidam rawh ti a inhlan thar zêl hi kan mamawh leh tih tur a ni.

Ka thuziah leh a chhiartu zawng zawng te Lalpan malsawm vek che u rawh se. Amen.