FAKNA 2-NA

THUFINGTE 27:2
Nangma kaa infak lovin mi dangin fak zâwk che sela; Nangma hmui ni lo, hmêlhriat loh mi hmuiin.

Thufing hian mahni infak aiin mi dangin min fak se a duh zâwk. Mahni infak chu mi dang tân pawh a ngaihnawm har ṭhin. In fak derna chuan thil a tichhe ṭhin bawk (Thuf.26:28b). A hun leh a hmun taka fakna erawh chuan thil a ti thei hle thung.

Charles Schwab-a, kahpathir siamnaa an manager chuan, “Mite an theihna sâng bera thawhtîr theih hi thil ṭul ber niin ka hria a. A tih dân hmang ṭha ber chu, an thiltih ṭhat apiang hriatpui a, faksak ṭhin hi a ni. Chutiangin an phûrna tihbo dân ṭha ber chu an thiltih sawisel fo hi a ni. Mi tumah ka sawisel ngai lo va, miin phûr tak leh nuam ti taka an thawh theih hi ṭul berin ka hria a; an tlin lohna laite hmuh kânin, fakna lam hi ka uar zâwk ṭhin. An thiltih ṭhat lai apiang fak leh chawimawi hi thawk nasa zâwk tûra infuihna ṭha ber niin ka hria” a ti. Nuam ti taka miin hna an thawh theihna tûrin fakna ṭawngkam i ui u!