KAN TLANTU A NUNG

THUPUAN 1:18
Minunga chu ka ni, ka thi a; nimahsela, ngai teh, tûnah zawng chatuana nung tûrin ka lo tho leh ta a; thihna leh mitthi khaw chabite ka nei a ni.

A thawhlehna ṭawmpuitu nula pakhat chanchin an sawi hi i lo hre ve em. Vawi khat chu Conductor Reichel-a chuan a zaipawl leh rimawi tumtute chu Handel-a hlate mi hmaa an sak hmain enlâwkna a neihpui a. A hun dik takah soprano-a malzaitu chuan dik leh nalh zet mai hian, “Ka tlantu chu a nung tih ka hria” tiin a rawn sa a.

Thiam an tih êm avangin mi dang zawng zawng chuan conductor-in a fak ngei an lo beisei ṭheuh a. Conductor chuan a zaipawl hruaina tiang hmang chuan rimawi leh zaipawl chu titâwpin malzaitu chu a pan phei a, pawi tih hmêl zet hian, “Ka fanu, i tlantu hi a nung tih i hre nang e? I hria em?” a ti ta mai a.

Ani chuan, “Engvangin, e, aw… ka hriain ka inhria,” a ti a. Reichel-a chuan, “I hre tak tak anih chuan chu chu sa ta che; tholeh LALPA thiltihtheihna chuan a awmpui che avânga i hlimna chu ka hriatpui theih turin i hla sak hmang ngei khan min hrilh ta che” a ti ta khur khur mai a.

Rimawi tumtute chu a ṭantir leh nghal vat a, nula chuan Krista thawhlehna chu a ṭawmpui tak tak tih tilang thei khawpin a chanvo chu a han sa chho ta a. A ngaithlatute mittui a tla a, conductor putar ngei pawh chuan mittui far koh koh chungin, “I hria e, tunah chuan Krista chu a tholeh ngei a ni tih min hrilh chiang ta!” tiin lawmthu a hrilh ta hial a ni.

Ṭhiante u, kan tlantu nung leh hian kan nun sawi nghîng tur hian engtiang chenin nge a thiltihtheihna hian min khawih theih kan rin le.