MITTHI KHUAAH A ZUK KAL A

1 PETERA 4:5-6
Anni chuan mi nung leh mitthite ngaihtuah tûra inpeih sa hnênah chuan an chanchin an la sawi ang. Hemi avâng hian a ni mitthite hnênah pawh chuan Chanchin Ṭha hrilh a nih ni, tisaa awm mihringte anga ngaihtuahin an awm a, thlarau erawha Pathian anga an nun theih nân.

Mizo pi pute pawh khân mitthi khua an nei ve a. Kan Kristian hnu pawh hian thih hnu piah lam min thlîr thiamtîr hlein a lang. ‘Mitthi khua’ tih hi ‘hremhmun’ (hell) ni lovin, ‘mitthite chênna’ (Hades) a nih hmêl. Pathian rorêlna hnuhnûng thlen hmâa chên lâwkna a ni mai thei. Judate chuan mi an thihin a thlarâu chu khawi maw lai chawlhnaah awm tûrah an ngai a. Chu ngaihdân behchhan chuan Petera pawh hian lehkha hi a ziak a ni mai thei e.

Kan thupui hian Lal Isua hi mihring famkim, mihring thih anga thi thei a nihzia te, thihna hnehtu a nihzia te leh a khawngaihna thuchah hian thlen loh lai rêng rêng a neih loh thu te, mitthi khua thleng pawhin Chanchin Ṭha hrilh a nih thu te min zirtîr a ni.